BAGUIO CITY – Nabigbigen dagiti lima a lallaki a nakipinnaltog kadagiti otoridad sadiay Barangay Malalao, Tabuk, Kalinga idi kalman.
Maibasar iti report, nabigbig dagitoy a da Ian Zalutin Zulueta; Jose Libreja; Joel Fajardo; ken dagiti agkabsat a da Eric Acuziden ken Terio Acudizen, bin-ig a construction worker ken residente iti Tangle, Mexico City, Pampanga.
Sigun iti pamilya ti agkabsat nga Acudizen, nagpakada dagitoy a makitrabaho iti construction sadiay Novaliches, Quezon City idi Martes (Abril 26).
Naamuan a sinukon ni Libreja dagiti dua a nakalugan iti pagtaenganda sadiay Barangay Tangle babaen iti maysa a Montero.
Iti baet ti dayta, impetteng ti pamilya ken barangay official sadiay nga awan iti record dagiti dua iti anyaman a krimen iti barangay dagitoy.
Iti agdama, manamnama iti isasangpet ti Mexico City Mayor Teddy Tumang sadiay Tabuk City tapno makikoordinar kadagiti maseknan para iti panakaiyawid kadagiti lima a lallaki.
Hustisya ita ti kidkiddawen dagiti pamilya dagitoy a nabatbati sadiay Brgy. Tangle, Mexico City Pampanga.
Maipalagip a napasamak ti nasao a pannakipinnaltog dagiti nasao a lallaki idi kalman kasaruno ti naawat dagiti otoridad nga impormasion mainaig iti presensya dagiti robbery hold-up gang nga ag-op-operate sadiay Region 2, 3 ken 4 ken agibibiahe ti marijuana sadiay Tabuk City.
Gapu iti daytoy, dagus a nangipatungpal dagiti intel operative ti casing ken surveillance sadiay Bulo, Tabuk City Kalinga a nakaparaan ti maysa a gray/black almera a kotse nga addaan ti plate number nga NUS 11.
Nupay kasta, saan a nagsardeng ti nasao a lugan ken nagpaputok pay ti paltog dagiti nakalugan iti daytoy. Kinamat dagiti otoridad ti lugan agingga a nakadanonda sadiay Barangay Malalao, Tabuk City Kalinga a nagresulta iti panagpinnaltog dagitoy a nangitunda iti ipupusay ti dagiti suspek
