Addan iti natalged a kasasaad dagiti lima nga indibidual pakairaman ti driver a nadangran kalpasan a natnag ti luganda iti agarup lima pulo metro ti kauneg a rangkis a napasamak sadiay Tinongdan, Itogon, Benguet.
Ti driver ket ni alyas ” Jerry” legal age ken store owner bayat a dagiti pasaherosna ket da alyas ” Ricky” baente tres anyos, maysa a single, alyas “Edward” legal age, single, alyas “Bal” trentay tres anyos, naasawaan kenni alyas ” Joseph” legal age,maysa a laborer.
Dagitoy ket agpapada a residente sadiay Binga, Tinongdan, Itogon, Benguet.
Maibasar iti report ti pulisya, paawid dagiti lima iti pagtaenganda manipud Poblacion, Itogon , Benguet ngem bayat iti panagawidda naiturugan ti driver rason a naawanan iti kontrol ti manibela nga isu’t rason iti pannakatnag ti lugan iti rangkis.
Sigun metlaeng kadagiti pasahero nakainum ti driver nga isu’t maysa a rason a nagtuglep daytoy.
Gapu iti dayta, nagsagrap amin dagitoy iti injuries bayat a nadadael metlaeng ti lugan.
Dagus met a nagresponde dagiti otoridad ken naiturong dagitoy iti Itogon District Hospital tapno mataming dagitoy.
Nupay kasta, tallo kadagitoy ti naiyakar wenno nairefer sadiay Baguio General Hospital and Medical Center para iti kanayunan a panakataming bayat a dagiti dua ket nagtalinaed iti Itogon district Hospital.
Ita agdama ket agpapada a nakaruwar ken nasayaat ti kasasaad dagitoyen.
Kagiddan dayta, nagpalagip dagiti kameng ti pulisya ken dadduma pay nga otoridad a saan nga agmaneho nu addaan iti impluwensiya ti arak no sadino ti kasayaatan nga aramiden ket iturug pay wenno ipamaneho ti lugan iti kadua tapno maliklikan ti disgrasya.//Bombo Noveh Organo
