Naduktalan dagiti lima nga indibidual nga ambulant vendors iti Baguio Public Cemetery ken iti private cemetery iti siudad kagiddan ti umuna nga aldaw a panang-obserbar iti All Saint’s Day ken All Soul’s Day idi laeng kalman.
Iti panakiuman ti Bombo Radyo kenni Dennis Ramirez, Public Order and Safety Division-Enforcer kinuna nga agsisinublat dagitoy nga agliblibas nga agilaklako rason nga iti baet a nakumpiskar dagiti ilaklako dagiti immunan a nagpwesto iti uneg ti sementeryo ket adda paylaeng dagiti naimatangan nga agilaklako apaman a mailinged dagitoy.
Sigun kenni Ramirez, agtultuloy ti panagrikusda iti uneg ken ruar ti sementeryo ken kadagiti lugar a saan a mabalin a paglakuan dagiti ambulant vendors tapno sitaen dagitoy nangruna ta adda latta dagiti illegal vendors nga agrikrikus.
Impettengna a dagiti nakumpiskar ket dagiti kandila, biscuits, mainum ken dadduma pay.
Kabayatanna, dumanon iti sangapulo a personnel dagitoy ti naideploy idi kalman no sadino lima ti nakauniporme a nagserbi kas roving ken lima met ti saan a nakauniporme nga agserserbi kas anti illegal vendors.
Kagiddan dayta, nagkiddaw dagitoy iti kooperasyon dagiti illegal vendors a liklikanda paylaeng ti agilako iti uneg ken ruar dagiti sementeryo.//Bombo Noveh Organo
