BAGUIO CITY – Saan a mailadawan ti ragsak a marikrikna ita ni Lion’s Nation MMA fighter Eduard Folayang kalpasan a naikkan ti pammadayaw kas Sports Personality of the Year 2024 manipud iti International Association of World Peace Advocates.
Sigun iti two time One Lightweight Champion, nalaos ti panagyamanna kadagiti parabor nga ipapaay kenuana ti Namarsua gapu paylaeng iti agtultuloy a panangital-o na ti sports a mix martial arts.
Kinuna pay ti Wushu practitioner nga itultuloy na ti adbokasiyana a padur-asen ti ay-ayam nga MMA ken agbalin a tulbek tapno makaisuro ken mangdiskobre pay kadagiti potential athletes a sumaruno a rupa ti Philippine MMA.
Iti agdama ket agtultuloy ti nainget nga ensayona iti Landslide Martial Arts Training Center idiay La Trinidad, Benguet tapno nakasagana a kanayon iti posible a laban manen daytoy iti One Championship cage ita a tawen.
Mangnamnama daytoy a mainayom kuma iti fight card ti ONE idiay Amerika.
Maipalagip a rinambakan ti Lion’s Nation MMA ti maysa a tawen nga anibersaryo dagitoy idi napalabas a lawas nu sadino dimmar-ay ditoy dagiti mabigbigbig nga MMA fighters kas kada Danny Kingad, Jeremy Pacatiw, Edward Kelly, and Stephen Loman.
Karaman iti nasao nga MMA club da sigud nga One MMA champions kas kada Kevin Belingon, Honorio Banario ken current One Straweight Champion Joshua Pacio.//Bombo Jordan Tablac
