Agtaltalinaed nga adda iti pagagasan ni Agosto Bolodoken, ti naispal iti napasamak a Vehicular Traffic Accident idiay Sitio Maramal Barangay Camp 4, Tuba, Benguet idi kalman.
Iti panakiuman ti Bombo Radyo kenni Police Captain Aida Esteban,Operations Officer iti Tuba Municipal Police Station, kinunana a saan pay a nangipaay iti statement ni Bolodoken gapu ta posible a makapaspasar daytoy iti trauma kasaruno ti aksidente nangruna ta dua kadagiti kakaduana ti pimmusay.
Immuna metten a nabigbig dagiti pimmusay a da Michael Gayob Mader-an, 46-years old, driver ken ni James Liwan Wagne, 31-years old ken maysa a pahinante.
Agpada dagitoy a residente idiay Tadiangan, Tuba, Benguet.
Sigun kenni Police Captain Esteban,makitkita a maysa a rason ti loose brake iti panakatnag ti Mini Dump truck iti rangkis nga addaan iti kauneg a 100 metro, paturong iti Bued River.
Maatap met a dinalapos ti lugan ti barrier iti kalsada ngem natnag daytoy.
Kinuna ni Police Captain Esteban a naipakaammo ti aksidente kalpasan a nakita ken nangeg ti maysa a residente ti panakatnag ti lugan iti rangkis.
Dagus met a nagkiddaw daytoy iti tulong kadagiti karubana nga isu met ti nangkontak iti pulisya ken ditoy a narespondean ti aksidente.
Maibasar iti imbestigasyon, ti ipupusay ti biktima ket gapu iti panakaiyanod daytoy bayat a ti maysa ket gapu iti Hemorrhagic shock.
Inaklon ni Esteban narigatan dagitoy iti panagrespondeda kasta met dagiti volunteers gapu ta agtudtudo idi napasamak ti aksidente bayat a manariman paylaeng met ti panakatarimaan ti Kennon Road.
Kabayatanna, pinagyamanan ni Esteban dagiti amin a timmulong tapno dagus a maala dagiti biktima a natnag iti rangkis pakairaman ti siudad ti Baguio ken dagiti volunteers a manipud Camp 6 nga iti agdama ket manarimaan paylaeng met a tumultulong iti clearing operation iti napasamak nga uram idi Enero a Uno.
Kabayatanna, naiyawid metten iti pagtaenganda dagiti dua nga indibidual a pimmusay iti napasamak nga aksidente.//Bombo Mera Pacpacan
