BAGUIO CITY – Saan pay a maipatungpal ti “No Vaccine, No Work” a polisiya para kadagiti empleyado ti lokal a gobyerno ti La Trinidad, Benguet.
Dinakamat ti mayor ti munisipyo a 90 paylaeng nga empleyado ti municipal government ti saan a nabakunaan kontra iti COVID-19 manipud iti nasurok 400 nga empleyado sadiay.
Sigun kenkuana, manipud kadagiti saan pay a nabakunaan ket adda dagiti nangibaga a nabakunaanen dagitoy iti dadduma a lugar nupay kasapulan paylaeng a mangipakita dagitoy ti kaskenan a vaccination card.
Innayonna a kiniddawda ti kapanunutan ken balakad ti
Commission on Human Rights isut gapuna a saanda paylaeng nga ipatungpal ti inkapilitan a panagpabakuna kontra iti COVID-19.
Iti baet daytoy, imbinglay ti mayor nga adalenda paylaeng no isingasingda met ti linawas a panakaipasidong iti RT-PCR test dagiti municipal employees a saan pay a nabakunaan kontra iti COVID-19.
Iti agdama ket agtultuloy ti panangallukoyda kadagiti umili ken empleyado ti lokal a gobyerno a saan pay a nagpabakuna para iti panagnumar dagitoy iti manarimaan a COVID-19 vaccination program ti gobyerno.
