Pormalen nga inyawat dagiti mangbukbukkel iti Proclaim Cong. Yap Now Movement ti “Manifesto of Solidarity and Support” kadagiti opisyal ti Commission on Elections – Cordillera ita nga aldaw.
Dagiti nasao a dokumento ket pinirmaan ti nasurok 36,000 a residente ti Benguet kas panangipakitada iti suportada iti matartarigagayan a dagus a pannakaiproklama ni Benguet Congressman-elect Eric Yap.
Ti nasao a bilang ti signatures ket nasursurok manipud iti target dagiti mangidadaulo iti nasao a movement a 7,200, ti 5% manipud kadagiti nasurok 144-K a botante a nagbotos iti nasao a kongresista.
Maipalagip a nasuspindir ti proklamasyon ni Yap idi Mayo 13 gapu iti sangsangoenna a disqualification case.
Maibasar iti kaudian a datos, pito a disqualification case ti naipila kontra kenni Yap ngem dumanonen iti tallo nga affidavit ti naipila a mangibabbabawi iti petisyonda.
Sigun kenni Atty. Francis Camtugan, ti abogado dagiti sumagmamano a supporters ni Cong. Yap, agturongda iti main office ti COMELEC sadiay Manila inton bigat tapno isubmitir wenno iyawat ti kopya ti nasao a manifesto.
