BOKOD, BENGUET | Makaaw-awat ti pamadayaw ken panagkablaaw ti Top no.2 iti kaleppas a Medical Technologist Licensure examination manipud Bokod, Benguet kalpasan ti panagballigina iti nasao nga eksaminasyon.
Iti panakiuman ti Bombo Radyo kenni Jed Ataban Cangsan, Top no.2 iti Medical Technologist Licensure Examination, impeksana a kasapulan ti panangipaay ti oras iti panagrepaso wenno panagadal.
Sigun kenni Cangsan, nakatulong kenkuana ti suporta ken talek dagiti pamilyana.
Nupay kasta, nagbalin a karit kenni Cangsan ti napalabas a pandemya gapu ta kasapulan ti time management iti personal ken iti panagadalna.
Iti baet ti panagballigi daytoy, saana nga inlibak a pinanggepna ti agsardeng iti panagadalna gapu iti kinarigat ti kurso daytoy.
Ngem gapu iti panagayat a sipapannekkel dagiti pamilyana, dagiti mannursuro ken papagayamna, inaramidna ti kabaelanna tapno makaleppas daytoy iti kurso a Medical Technologist.
Impaganetget ni Cangsan a ti maysa a nagbalin a tulbek tapno agballigi daytoy iti board examination ket ti saan a panagsardeng iti pananggun-od kadagiti arapaap ken ti agtultuloy nga agadal, ti panagtalek iti abilidad ken kangrunaan iti amin ket ti panagtalek iti Dios a namarsua.//Mariel
