BAGUIO CITY – Mapapati a naiyanod ti maysa a lalaki kabayatan ti panagballasiwna iti karayan tapnu apanna kitaen dagiti tarakenna a baka sadiay Quidaoen, San Juan, Abra idi kanikadua.
Nabigbig daytoy a ni Joseph Luis Tadeo Barbosa, 57-anyos, mannalon ken residente ti Quidaoen, San Juan, Abra.
Sigun kenni Abra PDRRM Officer Arnel Valdez, mapapati a kabayatan ti panagballasiw ni Barbosa iti Tineg River ket naiyanod daytoy iti napegges nga ayos ti danum.
Gapu iti daytoy, makidkiddaw ti tulong dagiti kabangibang a lokal a gobyerno iti Abra ken Ilocos Sur para iti dagus a panangipaka-ammoda iti Abra PDRRMO no adda ti makitada iti bagi ni Barbosa.
Naudi a nakita ni Barbosa iti agarup 10:30 AM idi kalman, July 29 iti deppaar ti Tineg River.
Iti agdama, manarimaan ti search operation dagiti maseknan nga opisina ken ti pulisya.
