BAGUIO CITY – Naibaluden ti maysa a mannalon sadiay Benguet kalpasan a nakemmeg iti entrapment operation a naisayangkat iti Benguet Agri-Pinoy Trading Center gapu iti panagilakona ti peke a pestisidyo.
Nabigbig daytoy a ni Damson Osngao, 38-anyos, naasawaan ken residente ti Betag, La Trinidad, Benguet.
Immuna iti daytoy, nakagatang ti operatiba ti Criminal Investigation and Detection Group iti peke a pestisidyo manipud iti suspek ken impasukimatda daytoy iti Fertilizer and Pesticide Authority – Benguet Chapter.
Naduktalan iti panagsukimat ti grupo a peke ti nasao a pestisidyo.
Gapu iti daytoy, nangisayangkat dagiti otoridad iti entrapment operation a nagresulta iti panakakemmeg ti nasao a mannalon.
Nakumpiskar pay kenni Osngao ti 11 a bote ti Abamectin nga aggatad ti P24,000 ken 20 a bote ti Paraquat Dichloride nga aggatad ti P20,000.
Sumangsango ita ti nasao nga indibidual iti kaso a panaglabsing iti Presidential Decree No. 1144 a mangitudtuding iti panaka-aramat ken panakailako dagiti abono ken pestisidyo. (-with Bombo Charles Nikko Limon)
