BAGUIO CITY – Nasarakan ti maysa a agruprupsa a bangkay iti Banenbeng Creek sadiay Pambasan, Ampucao, Itogon, Benguet idi kanikadua.
Iti interview ti Bombo Radyo kenni PMajor Romel Sawatang, hepe ti Itogon PNP, mapapati a lalaki ti nasao a bangkay.
Atapen dagiti pulis a daytoy ti lalaki a naireport a mapukpukaw bayat ti kaaddana iti igid ti karayan sadiay Dalupirip, Itogon.
Atapenda pay a ti nasao a bangkay ket maysa kadagiti mapukpukaw manipud idi naglabas a bagyo nga Ompong idi napalabas a tawen.
Nasarakan ti nasao a bangkay babaen iti maysa nga indibidual nga agsaysayo iti nasao a karayan.
Dinakamat ni Sawatang a naiturong ti nasao a bangkay iti maysa a punerarya sadiay Marcos Highway ditoy Baguio City.
Umap-apelada pay kadagiti addaan kabagian a napukaw idi bagyo nga Ompong tapnu makikoordinada iti Itogon PNP wenno saan ket agturongda iti nasao a punerarya. (with Bombo Florence Paytocan)
