BAGUIO CITY – Agtaripnong manen dagiti mayor iti Baguio City, La Trinidad, Itogon, Sablan, Tuba and Tublay wenno BLISTT Area tapnu mabukel ti maymaysa a protocol a maipatungpal iti border control checkpoints iti Metro Baguio.
Iti interview ti Bombo Radyo Baguio, kinuna ni La Trinidad Mayor Romeo Salda a napagsaritaanda a mairaman dagiti agtaud kadagiti dadduma a munisipyo ti Benguet ken probinsia iti Cordillera a maistriktuan iti nainget a border control ti BLISTT Area.
Inlawlawagna a babaen daytoy ket maliklikan ti ad-adda a panagngato ti kaso ti COVID-19 iti lokalidad babaen kadagiti makaskastrek nga indibidual nga agtataud iti dadduma a lugar a saan a naipasidong iti nainget a panagsukimat.
Patienna a nasken a maistriktuan ti non-essential travels bayat a kasapulan nga adda ti kaskenan a pagalagadan para kadagiti essential travels.
Dinakamat pay ni Mayor Salda a sadiay La Trinidad ket 64% iti nasurok 740 a pakabuklan a kasoda iti COVID-19 ket dagiti addaan ti panagbiahe iti dadduma a lugar.
Kinunana a makapa-alarma ti nasao a banag ngem saanda met a malapdan ti panagbiahe dagiti nasao nga indibidual.
Imbingayna pay nga innaldaw a 150 nga agal-ala ti travel pass ti ak-akomodaren ti lokal a gobyerno ti la Trinidad ngem ita a holiday season ket posible a saanda nga ipaayan ti travel pass dagiti saan a napateg a panagbiahe.
