BAGUIO CITY – Maap-apektaran ita ti kampanya kontra iti COVID-19 partikular ti contact tracing ken COVID-19 testing dagiti local government units (LGUs) gapu iti masungad nga eleksion.
Inwaragawag daytoy ni Contact Tracing Czar ken Baguio City Mayor Benjamin Magalong kagiddan ti panangkunana nga ita a panawen ket political survival iti paset dagiti sumagmamano nga opisyales dagiti LGUs.
Gapu iti daytoy, kinunana a nasken a saan a mapolitika ti panakaimaton dagiti kaso ti COVID-19 iti pagilian.
Dinakamatna nga adda dagiti mangibabbaba iti kaadu ti isaysayangkatda a COVID-19 testing ken contact tracing tapnu saan a rumwar a nangato ti kaso ti COVID-19 iti masakupanda ken agparang a nasayaat ti panangimaton dagitoy iti sitwasyon ti COVID-19 iti lugarda.
Innayonna a no maisayangkat ti nainget a panagsukimat wenno evaluation ket maduktalan a dagiti nasao nga LGUs ket awanan ti epektibo a sistema a manglaban iti COVID-19 pandemic kas iti nasimpa a contact tracing system, analytical tools, triage system ken dadduma pay.
Gapu iti daytoy, impetteng ni Magalong a nasken nga ituloy dagiti LGUs ti agresibo nga aksion kotra iti COVID-19 ken nasken a marikna dagiti local chief executives iti pagilian ti kinapateg ti posisyon ken trabaho dagitoy iti panakaparmek ti agdama a pandemya gapu iti COVID-19.
