BAGUIO CITY – Dakkel ti pammati ni Baguio Mayor Benjamin Magalong a patgan ni Presidente Rodrigo Duterte ti kiddawna a panakai-localize wenno modified community quarantine ti siudad bayat nga ipinaldan ti nabukel a plano ti Baguio para iti transition phase.
Iti eksklusibo a panakipatang ti Bombo Radyo Baguio kenni Mayor Benjamin Magalong, kinunana a tallo a lawasen nga isaksakadna ti panakaipalubos ti panag-localize ti community quarantine dagiti lokal a gobyerno a makabael a mangimaton iti sitwasyon iti lokalidadda.
Inlawlawagnan iti Inter-Agency Task Force for the Management of Emerging Infectious Diseases ti nakasagana a plano para iti recovery ken resiliency ti Baguio iti kanito a mapatgan ti localized community quarantine ti siudad.
Sigun kenkuana, ti nasao a plano ket resulta ti serye ti konsultasyon ti lokal a gobyerno ti siudad kadagiti amin a sektor para iti panagtinnulong dagitoy iti transition phase tapnu maipasigurado a saan a makompromiso ti salun-at ken kinatalged dagiti umili ti siudad kabayatan ti nasao a panawen.
Innayonna a babaen iti naisagana a plano ket maprebentaran ti posibilidad nga adda ti mapasamak a panagngato manen dagiti kaso ti COVID-19 ditoy siudad.
Inlawlawag metlaeng ni Mayor Magalong a babaen iti localized community quarantine ket mabaelan ti Baguio a maituloy dagiti programa ken proyekto tapnu makarekober ti ekonomiya ti siudad.
Dinakamat ni Mayor Magalong nga iti localized community quarantine plan ket in-inot a malukayan wenno maipalubos ti operasyon dagiti sumagmamano a sektor.
Imbingayna a ti construction industry ti kangrunaan nga ilukatda inton umuna a lawas ti Mayo gaputa kasapulan a maisimpa dagiti nakapempen ken narugianen a proyekto ti gobyerno nangruna ta panagtutudon ken addan dagiti patrabaho a narba wenno nadadael kas kadagiti maar-aramid a retaining walls.
Impasiguradona a kagiddan ti panaglukat ti construction industry ket aglukat met dagiti sektor a mangsupsuportar iti daytoy kas iti transportasyon, hardwares, electrical supplies, information technology ken autoshops.
