Nagkiddawen ti pammawakan ni Baguio City Mayor Benjamin Magalong iti Muslim Community gapu iti panangusarna iti sao a “moro-moro.”
Iti exclusive interview ti Bombo Radyo kenni Mayor Magalong, kinunana a naamirisna nga adda ti cultural sensitivity ti nasao a balikas ken saanna nga inggagara a saan a respetuen daytoy.
Sigun kenkuana, kadawyan gaminen a maar-aramat ti balikas a moro-moro a maar-aramat kas panag-angaw, isut gapuna nga inusarna daytoy kontra kadagiti naanomalyaan a flood control projects.
Ngem inlawlawagna a saan a daytoy ti mangkissay iti kredibilidadna iti panangkontra iti korapsion.
Maipalagip a kidkiddwen ni House Deputy Speaker Yasser Balindong kenni Mayor Magalong nga agkiddaw ti dispensar kadagiti Moro kalpasan nga inladawan ti panggepda nga imbestigasion ti Kamara iti flood control projects kas “moro-moro”.
Sigun kenni Balindong, nupay maipalubos ti nagduduma nga opinion iti demokrasia, saan koma a daytoy ti mangiturong iti pannakadadael ti dignidad ti kultura ken pakasaritaan.
Kinunana a mabalin met a kuestionaren ni Magalong ti aniaman nga isyu ngem saan a maakseptar ti panagaramatna iti sao a moro-moro para iti narabaw.
Impetteng ti lider ti Kamara a rumbeng nga agpakumbaba ti mayor ken ibaw-ingna ti sasaona agsipud ta kas maysa a lider, manamnama nga ipakitana ti respeto ken agpanunot a nalawag.
Kinunana nga umdasen ti panagpakawan saan laeng nga iti Kamara no diket kasta metten kadagiti tattao a Moro a dakkel ti pannakainsulto ti tawidda.
Kabayatanna, impetteng ni Mayor Magalong a saan nga agdispensar kadagiti kongresista a nasakit ti nakemna iti panagibagana maipapan kadagiti naanomalyaan a flood control projects.
Kinunana nga isuda koma ti agdispensar gaputa isuda ti dinakamat ti presidente iti State of the Nation Address daytoy nga “agbain” dagitoy.
Mainaig iti dayta, inlawlawag ni Imam Shams Maba Monib, Presidente ti Muslim Community Baguio-Benguet a ti panangawag ti “moro-moro” ket saanna a tuktukuyenna dagiti taga-Mindanao, malaksid laeng nu na-single out ti maysa nga indibidual ken naawagan kas moro.
Sigun kenni Imam Shams, maar-aramat ti balikas a “moro” nangruna nu adda ti inaramid ti maysa nga indibidual a saan a nasayaat a kas ti panagloko.
Kinunana a nasayaat laeng ti termino nga inaramat ni Mayor Benjamin Magalong a “moro-moro” iti panangiladawan iti imbestigasion ti kongreso iti naanomalyaan a flood control projects.
Gapu iti dayta, rumbeng a saan koma a nag-react ti siasinoman nga indibidual a natamaan ti balikas na.
Iti interview ti Bombo Radyo kenni Imam Sham, mangipasimudaag laeng a ti inaramid ni Magalong ken ti termino daytoy ket adda ti inaramid daytoy a saan a nasayaat isut gapuna a nag-react dagiti dadduma a kongresista.
Ad-adda nga inapresyar kitdi ti presidente ti Muslim Community iti Baguio-Benguet ti kampania ni Baguio City Mayor Benjamin Magalong a good governance.
