BAGUIO CITY – Impetteng ti lokal a gobyerno ti Baguio nga awan ti intensionda a mangilaksid iti La Trinidad-Itogon-Sablan-Tuba-Tublay (LISTT) area iti plano a panakailukat ti turismo iti nagbaetan ti Baguio ken Region 1.
Impalawag daytoy ni City Mayor Benjamin Magalong kasaruno ti panangipeksa dagiti sumagmamano a lokal a gobyerno iti LISTT area iti pakaseknanda iti nasao a plano nangruna ta adda dagiti munisipyo ti Benguet a dumalanan dagiti turista a mapalubusan a sumrek iti Baguio.
Kinunana a kiniddawna iti dadaulo ti Department of Tourism – Cordillera a partner-da iti nasao nga inisyatibo tapnu makonsulta nga umuna ti Benguet ken dagiti amin a probinsia iti rehiyon no nakalukat dagitoy a makipaset iti nasao a programa.
Nupay kasta, naidanun kenkuana a nagkedked dagiti lokal a gobyerno iti Cordillera gaputa saan pay dagitoy a nakasagana a mangilukat iti lugarda kadagiti turista ken obserbaranda pay dagiti mekanismo ti tourism bubble ti Baguio City ken Region 1.
Inyunay-unayna a ti nasao nga impormasyon ti nangipasigurado a nakonsulta amin a maseknan ken awan ti nailaksid iti planning process isut gapuna nga intuloyda ti proyekto.
Impetteng pay ni Mayor Magalong nga iti plano ket nainget a masurot ti tour package scheme no sadino, malimitaran ti garaw dagiti turista ken ditoyda laeng siudad nga agpasyar isut gapuna a saan a maapektaran dagiti kabangibang a munisipyo.
Innayonna a saan laeng a Baguio ti nagnumar iti plano ngem ketdi, agserbi daytoy a pangrugian iti panakaisubli ti panagdur-as manen ti ekonomiya ti rehion Cordillera.
Impasiguradona pay a mairaman ti LISTT area ken ti entero a rehion kadagiti dadduma pay nga inisyatibo ti Baguio City para iti panagbangon ti ekonomiya ti Cordillera.
