BAGUIO CITY – Posible a madiskwalipikar ti mayoralty candidate sadiay Bangued, Abra a nangsipat iti tallo a municipal employees a mangisaysayangkat ti voters’ education seminar iti maysa a barangay sadiay.
Iti panakiyuman ti Bombo Radyo Baguio kenni Atty. John Paul Martin, election officer ti Bangued, Abra, mabalin a basaran ti inaramid ni mayoral bet Ryan Luna tapnu madiskwalipikar daytoy iti midterm elections.
Nupay kasta, inaklonna nga atiddog ti proseso ti diskwalipikasyon gaputa kasapulan pay a makumbiktar wenno sentensiyado ti maysa a kandidato sakbay daytoy a naan-anay a madiskwalipikar.
Kinuna ni Atty. Martin nga idi napalabas a lawas ket naaddaan iti komosyon iti nagbaetan ni Luna ken dagiti tallo nga empleyado ti municipal government a supporters metlaeng ti kalabanna a ni reelectionist Mayor Dominick Valera.
Kinunana a narurud ni Luna idi nakitana a mangisaysayangkat iti shading kadagiti sample ballot dagiti tallo nga empleyado.
Immunan a nabigbig dagiti nagreklamo a da Drexell Bermudez, Rolly Bernardez ken Jayrome Bello.
Kinuna pay ni Atty. Martin a maka-ammon ti DILG ken ti Civil Service Commission no anya ti mapasamak iti tallo nga empleyado nga agserserbi a campaigners ti maysa a kandidato.
Inlawlawagna a nabilin dagiti amin nga empleyado ti gobyerno iti saanda a panangikampanya wenno panangpabor iti uray asinoman a kandidato.
