Patien ti grupo nga Alliance of Concern Teachers Union iti rehiyon Cordillera a saan nga ‘isolated case’ ti napasamak nga school shooting incident gapu ta mapaspasamak metlaeng daytoy kadagiti nagduduma a pagadalan iti pagilian a Pilipinas pakairamanan iti rehiyon Cordillera.
Iti pannakiuman ti Bombo Radyo kenni Joel Capulong, dadaulo ti nasao a grupo, impeksana a saan a rumbeng a maitudo dagiti parentes, mannursuro, ken ti pagadalan iti napasamak nga insidente.
Sigun kenkuana, rumbeng a kitaen ti napasamak iti ‘holistic approach’ no sadino matingiting dagiti rason no apay a mapaspasamak dagitoy a banbanag kadagiti estudyante.
Malaksid iti dayta, impeksa ni Capulong a saan nga umdas dagiti security forces kadagiti pagadalan no sadino, manmano laeng dagiti securities kadagiti school premises nu idilig iti pakabuklan a populasyon dagiti estudyante.
Gapu iti daytoy, patien ni Capulong a kasapulan a matingiting manen dagiti polisiya maipapan iti seguridad kadagiti pagadalan no sadino impettengna nga agsubli ti nasao nga isyu iti ‘budget’ a mailatlatang para iti sektor ti edukasyon.
Malaksid iti dayta, impettengna metlaeng a kasapulan a manayunan pay dagiti klasrums, guidance counselors a mangtutok iti ‘well-being’ dagiti estudante, security guards, ken mannursuro a nga mangtutok laeng iti panagsuro ken saan a mangasikaso kadagiti admin works.//bombokaren.c.sapirao
