BAGUIO CITY – Manamnama a mapilaan iti kaso a panaglabsing iti RA 7610 wenno ti Special Protection of Children Against Abuse, Exploitation, and Discrimination Act ti maysa a lalaki kalpasan nga inaprusanna ti siket ken barukong ti menor de edad iti uneg ti pampasahero a jeep sadiay La Trinidad, itay nabiit.
Nabigbig daytoy a ni Roger Saldo Lipaen, 25-anyos, tubo ti Bagulin, La Union ken residente ti La Trinidad, Benguet.
Maibasar iti imbestigasyon, naglugan ti biktima iti jeep ngem sinurot ken inabay daytoy ti suspek.
Ditoyen nga inaprusanna ti suspek ti nagduduma a paset ti bagi ti biktima.
Nagdisaag ti suspek sadiay Brgy. Lubas, La Trinidad, Benguet kalpasan ti inaramidna iti biktima.
Simmaruno met a rinumwar ti biktima ken dagus a nagreport kadagiti agpatpatrolya a pulis a nangitunda iti panakatiliw ti suspek.
