BAGUIO CITY- Pimmusay ti maysa a miyembro ti Weakened Guerilla Front-AMPIS iti engkwentro iti nagbaetan ti tropa ti 54th Infantry Battalion ken ti nasao a Communist Terrorist Group idi malem kalman sadiay Sitio Binangyuyaw, Barangay Namal, Asipulo, Ifugao.
Maibasar iti report, manarimaan ti military pursuit operation kontra iti WGF-AMPIS idi napasamak ti panagpinnaltog dagitoy a nagbayag iti nasurok lima a minutos a nagresulta iti ipupusay ti maysa kadagiti miyembro ti CTG.
Sigun kenni LtC Franz Joseph Diamente, Commander ti 54IB, manarimaan paylaeng ti panangberipikarda iti pakabigbigan ti napapatay a miyembro ti CTG.
Kagiddan iti dayta, nangibinsa daytoy iti panagladingitda iti ipupusay ti nasao nga indibidual gapu ta iti baet ti agtultuloy a panangguyuguyda kadakuada nga agsubli iti sidong ti gobierno ket pinilida latta nga agrebelde gapu iti biddot nga idolohiya ken pammati dagitoy.
Kabayatanna, nakarekober pay dagiti militar ti maysa nga M16A2 rifle a naibati ti maysa a miyembro ti CTG.
Maipalagip nga adda iti nagsaruno nga encounter dagiti militar ken kameng ti WGF-AMPIS iti nagduma a Barangay sadiay Namal, Asipulo, Ifugao idi Mayo 23 ken Mayo 24 a nakadangran ni alyas Junel, ti Vice Commanding Officer ti nasao a terrorist group nga inispal dagiti militar kalpasan nga imbati dagiti kakadwana.
Gapu iti dayta, namingsan manen nga immapela ni Diamante kadagiti nabatbati a miyembro ti CTG nga agsublida iti sidong ti gobyerno tapno saanen a maulit ti kapada nga insidente.
