Sumango ti maysa a vlogger iti panaglabsing iti Article 152 iti Revised Penal Code a mainaig iti Cybercrime Prevention Act of 2012 kalpasan a kinemmeg ti National Bureau of Investigation gapu iti panangmanipulana iti statement ni President Ferdinand Marcos Jr. no sadino inamaramidna nga itantandudo ti presidente ti “drug legalization.”
Maibasar iti report, ti na-alter a post ti vlogger ket na-share iti social media platform.
Inaklon ti vlogger nga inaramidna ti palso a damag tapno makagenerate daytoy ti income iti cyberspace.
Makasangsangit met a nagkiddaw daytoy iti pamakawan kenni President Marcos Jr.
Gapu iti dayta, kiddaw ni National Bureau of Investigation chief Jaime Santiago iti publiko a kitaenda a nalaing dagiti damag a maipabpablaak iti social media kasta met a nagballaag daytoy maipapan iti saan a panagiwaras kadagiti palso a damag gapu ta mabalin a mapilaan dagitoy iti kaso.
Innayon ni Santiago a rumbeng a saan nga agbalin a joke dagiti banag a saan a mabalin nga aramiden kas prank.
Inyunay-unayna pay ti panagbalin a responsable iti online, ti “Think before you click.”
