BAGUIO CITY – Natiliw ti maysa kadagiti suspek iti pammaltog a nagresulta iti ipupusay ti maysa a konsehal ti Tineg, Abra idi pay 2010 kalpasan nga inserbi dagiti otoridad ti warrant of arrest daytoy sadiay Dangdangla, Bangued, Abra itay nabiit.
Nabigbig ti nasao a suspek a ni Marnel Baldo Parado, 26-anyos, baro, tubo ti Caganayan, Tineg, Abra ken agnanaed ita sadiay Dangdangla, Bangued, Abra.
Maibasar iti rekord ti pulisya, ni Parado ken dagiti kakadwana nga immunan a natiliw a da Edwin Isao, Mando Parado, Louie Tejero ken Lowell Tejero ti suspek iti panakapaltog daydi Tineg Councilor Montano Inon ken ti dua pay a kadwa daytoy iti rabii ti January 18, 2010 iti national highway sadiay Bangued, Abra.
Naamuan a nakalugan dagiti biktima iti maysa a motorsiklo ken paturongda sadiay Bangued, Abra idi pinalpaltogan dagitoy dagiti suspek a nakalugan metlaeng ti motorsiklo.
Naitaray dagiti biktima iti ospital ngem saandan a naispal pay.
Gapu iti insidente, sumangsango ni Parado iti kaso a tallo a bilang ti pammapatay ken awan ti nairekomendar a piansa daytoy.
