PHILIPPINES – Ammo yo kadi mga ka-Bombo a maysa nga ina idiay Pampanga ti agtrabtrabaho iti nasurok sangapulo ket dua nga oras iti baet a P200 laeng ti maaw-awatna a sweldo?
Nabigbig daytoy a ni Agnes Perez, maysa a persons with disabilities manipud Mexico Pampanga.
Agtrabtrabaho ni Perez iti maysa a nalatak a burger restaurant iti baet a minimum laeng ti maaw-awatna a sueldo.
Maibasar iti post ti concern citizen a ni Miranda Ramos, naasian iti kasasaad ni Agnes idi nadanonna a kasla nabannog daytoy iti trabahona kas staff ken salesperson ti maysa a nalatak a burger restaurant.
Ad-adda pay a naasianda kenkuana idi naammuanda nga aglablabes iti minimum working hours ti busbusbosenna tunggal aldaw para iti P200 a sweldona nu sadino mabawasan pay daytoy P80 para iti pletena.
Sigun kenni Agnes, inawatna ti nasao a trabaho ken saan pay a nagsapol iti daduma nga oportunidad gapu ta nataenganen daytoy ken kinunana a saanna a nalpas ti panagadalna.
Maysa pay a pagdandanaganna ket ti kondisyonna a makaap-apektar iti panagsaona.
Iti agdama, makaaw-awat daytoy iti nagduduma a rekasyon ken namnamen ni Miranda a makabirok ken maipaayan ni Agnes ti trabaho nga addaan ti benepisyo ken umno a sweldo.
