Naipaima iti Baguio City Jail Female Dormitory ti maysa ina kalpasan a nakemmeg daytoy sadiay Balibago, Angeles, Sison, Pampanga gapu iti kasona a carnapping idi tawen 2019.
Iti panakiuman ti Bombo Radyo kenni Police Captain Dindo Salming, ti nasao nga ina ket agtawen iti nasurok limapulo ken sigud a residente sadiay Camp 7, Baguio City.
Kinuna ni PCPT. Salming a ti nangidarum kenkuana iti kaso a carnapping ket ti kabagyan dagitoy.
Maibasar iti imbestigasyon, agparparang a binulod ti suspek ti lugan ti kabagyanna ngem saanna nga insubsubli daytoy.
Nupay nasolbar ti nasao a kaso idi tawen 2019, saan dagitoy nga in-update kadagiti otoridad rason a sitatalinaed daytoy iti existing warrant of arrest.
Agparparang a ti napasamak nga agreement ti dua a partido ket internal agreement laeng ken saan nga imbabawi ti nasao a biktima ti darum daytoy kontra iti suspek.
Gapu iti dayta ket adda ti nasao nga ina sadiay Baguio City Jail Female Dormitory iti agdama.//Bombo Genzel Depayso
