Imbilin ti Israel ti pannakaserra ken pannakaibakuit dagiti pasiente manipod iti maysa kadagiti maudi nga ospital iti paset iti “nasakop” a lugar iti amianan nga igid ti Gaza Strip.
Gapu iti dayta, marigatan dagiti manggagas a mangsapul iti wagas tapno maiturong dagiti ginasgasut a pasiente ken empleado iti natalged a lugar.
Sigun iti dadaulo ti Kamal Adwan hospital idiay Beit Lahiya, Husam Abu Safiya, ti panagtulnogda iti pammilin a maipaserra ti ospital ket narigat a mapasamak gaputa saan nga umdas ti ambulansia a mangiruar kadagiti pasiente.
Maibasar iti datos, dumanon iti uppat a gasut a sibilian iti adda iti pag-agasan pakairaman dagiti maladaga iti neonatal unit nga agbibiag a nakadependar iti oxygen ken incubators.
Sigun kenni Abu Safiya, saanda a mabalin a maibakuit dagiti pasiente a natalged nga awan ti tulong, equipment ken oras.
Iti agdama, awan pay ti komento ti army iti mensahe ni Abu Safiya, dadaulo Kamal Adwan hospital.
