BAGUIO CITY – Nakasaganan nga agturong sadiay Singapore ni Cordilleran ken MMA fighter Jeremy “The Juggernaut” Pacatiw para iti sumaruno nga laban daytoy.
Iti interview ti Bombo Radyo Baguio, kinuna ti 25-anyos Cordilleran fighter a nainget ti panagsanay daytoy gaputta karit kenkuana ti panagsangoda kenni Brazilian MMA fighter Fabricio “Wonder Boy” Andrade iti ONE: Full Circle intun Pebrero 25.
Nainget pay a bambantayanna ti panakipulapolna iti publiko tapnu saan a makaptan iti aniaman a sakit kas panagsagana iti panagturongda sadiay Singapore intun Pebrero 20.
Sigun kenkuana, karit daytoy para iti posibilidad a mangabak ken maipangato ti ranngo-na nangruna pay ta Rank no 4 iti bantamweight division ti World Championship ti Brazilian fighter a makabalubalna.
Iti agdama ket imet ni Pacatiw ti rekord iti MMA nga 11 a panangabak ken 4 a panakaabak bayat a maika-12 a ranggo iti Bantamweight ken maika-11 a rank kadagiti 92 nga aktibo nga Asia Southeast Pro Featherweights.
Malaksid iti dayta, maika-12 met ti ranggona iti Bantamweight ken maika-13 a ranggo kadagiti 202 nga aktibo nga Middle East Pro Featherweights.
