BAGUIO CITY – Impannakel ni House Speaker Allan Peter Cayetano dagiti moderno ken baro a sports venues para iti panang-host ti pagilan iti maika-30 nga edisyon ti Southeast Asian (SEA) Games inton November 30 agingga December 11.
Maipalagip a ni Cayetano ti agserserbi kas dadaulo iti Philippine Southeast Asian Games Organizing Committee.
Iti panagbisitana ditoy siudad ti Baguio, kinunana a world-class dagiti naipatakder a venues sadiay Clark City, Pampanga, Batangas, Tagaytay ken Metro Manila.
Gapu iti daytoy, maragsakan ti sigud a senador iti napartak a panakaipasdek dagiti pagay-ayaman a dar-ayan ken pasetan dagiti agarop 50,000 a delegado manipod iti 11 a miyembro ti Asian countries.
Innayonna a makumikom ita ti nasao a komite iti panangipaayda iti akreditasyon kadagiti international media nga ag-cover iti nasao a pasalip malaksid iti panangipaay iti suporta kadagiti atleta ken coaches ti Pilipinas.
Sigun pay kenni Cayetano, kasapulan ti panakitinulong dagiti Pilipino tapno agbalin a naannayas ti panakaipatungpal ti SEA Games ditoy pagilyan. (-with Bombo Jordan Tablac)
