BAGUIO CITY – Ar-aramaten itan ti Baguio General Hospital and Medical Center (BGHMC) ti Artificial Intelligence COVID-19 Scan Analyzer nga impatulod ti maysa a multinational technology company para iti Baguio City a makatulong iti panaka-adal ti kaso dagiti mapagat-atapan a nakaptan iti COVID-19.
Sigun kenni Mayor Benjamin Magalong, nasimpan dagiti technical glitches ken ti configuration ti makina.
Kinunana a nabaelan ti makina a mangadal iti sasaaden ti bara ti maysa a tao ken iti senyales ti COVID-19.
Imbingayna nga iti test run ti makina ket naaramat daytoy kadagiti 10 a healthcare workers ti BGHMC a naaddaan ti close contact kadagiti COVID patients ken ditoy a maysa kadagiti healthcare workers ti nakitaan ti viral lung infection.
Gapu iti nasao a resulta, naalaan iti swab test ti nasao a health care worker para iti kumpirmasyon iti kasasaad daytoy.
Sigun pay kenni Mayor Magalong, in-inot ita a magungun-od ti panakaprebentar ti COVID-19 babaen iti nasapa a panakaduktal daytoy nga agresulta met iti nasapsapa a contact tracing.
