BAGUIO CITY – Im-imbestigaran ita ti Philippine Drug Enforcement Agency (PDEA) ken ti Philippine National Police (PNP) ti modus dagiti sindikato a panagbayadda kadagiti agtutubo nga umay sumarungkar ditoy rehiyon Cordillera ken agiyawid ti marijuana sadiay Metro Manila.
Kasaruno daytoy ti serye ti panakakemmeg dagiti sumagmamano a turista, pakairamanan dagiti agtutubo ken menor de edad gapu iti panangibiaheda iti marijuana.
Sigun kenni PDEA-Cordillera public information officer Rosel Sarmiento, adun ti maaw-awatda a report a mabaybayadan dagiti agtutubo tapnu agbalinda a turista ditoy Cordillera ken iti panagsublida sadiay Metro Manila ket adda ti imetda a marijuana.
Maipalagip nga idi July 28 ket pito nga agtutubo pakairamanan ti uppat a menor de edad manipud Central Luzon ti nakemmeg iti bus terminal sadiay Barangay Sto. Niño ditoy Baguio gapu iti panangimet ken panangibiaheda iti 27 a marijuana bricks ken dua a nabalkot a marijuana.
Nakemmeg idi July 21 ti siyam a turista manipud Metro Manila iti nagsina nga operasyon sadiay Ifugao ken Kalinga gapu iti panangibiahe dagitoy iti marijuana nga aggatad amin iti dumanon P4-M.
Nakemmeg metlaeng idi April ti tallo a turista manipud Muntinlupa City a simmarungkar sadiay Tinglayan, Kalinga kabayatan ti Semana Santa ken nakumpiskar kadakuada ti P2.4-M a gatad ti marijuana.
