BAGUIO CITY – Manarimaanen ti panang-monitor ti Department of Social Welfare and Development (DSWD) – Cordillera iti agarup 370,000 a pamilya iti rehiyon nga apektado iti krisis gapu iti COVID-19 a mabalin a sakopen ti Social Amelioration Program.
Linawlawagan ni DSWD-Cordillera Regional Director Leo Quintilla a ti naituding a subsidiya a P5,500 tunggal bulan ditoy rehiyon ket saan a per agency assistance ngem ketdi, pakabuklan a tulong manipud kadagiti agdama a programa dagiti supporting agencies kas iti DSWD, Department of Agriculture, Department of Trade and Industry ken Department of Labor and Employment.
Kinunana nga agarup 304,590 a COVID-19 affected families a bukbuklen ti agarup 1.2 million nga indibidual iti Cordillera ti maiwanwanawan ken maipangpangruna para iti government assistance.
Karaman iti listaan dagiti benipisaryo ti Pantawid Pamilyang Pilipino Program ken dagiti dadduma a nakukurapay a pamilya a nakalista iti DSWD Listahanan.
Kabayatanna, imbingay ni Quintilla nga iti datus ti DSWD-Cordillera idi March 29 ket nakaipaay dagiti lokal a gobyerno iti agarup P43-M a gatad ti tulong kadagiti apektado a pamilya iti rehiyon bayat nga agarup P4.3-M ti nagtaud iti dadduma a donors.
Dinakamatna a nangited ti DSWD Central Office iti P20-M a Quick Response Fund para iti DSWD-Cordillera para iti produksion ti 34,000 a family food packs a manamnama a maiwaras ita a lawas.
Innayonna nga ad-adda pay nga irtengan ti opisinada, dagiti partners ken volunteers dagitoy ti panag-repack ken panagwaras kadagiti food packs para kadagiti agkasapulan a pamilya.
