BAGUIO CITY- Sumagmamano laeng ti kaso ti African Swine fever (ASF) a nailista iti probinsia ti Benguet ita umuna nga kwarter ti 2022 nu idilig iti napan a tawen.
Iti interview ti Bombo Radyo Baguio kenni Benguet Veterinary Officer Dr. Miriam Tiongan, kinunana nga nailista laeng ti kaudian a kaso ti ASF idi Enero 3 agingga 9 ken awanen ti kaudian a kaso a nailista ti probinsia.
Karaman kadagiti munisipyo a nakailista ti kaso ket ti munisipyo ti Itogon ken Tuba nu sadinno 3 nga mannalon wenno agtartaraken ti baboy ti apektado manipod iti munisipyo ti Tuba ken Itogon.
Dumanonen met iti 95 ti pakabuklan nga bilang dagiti napapatay wenno depopulated nga baboy kalpasanda a nagpositibo iti ASF.
Inaklonna met a saan a nalaka nga mabigbig dagiti lugar a pagtataudan dagiti maisangsang-at ditoy lokalidad a baboy wenno produkto ti baboy nga addaan iti ASF.
Nupay kasta, agtultuloy ti koordinasyon dagitoy kadagiti otoridad pakairamanan ti puliysa a mangsuksukimat kadagiti maibibiahe nga baboy kadagiti border checkpoints pastrek iti probinsia ti Benguet wenno iti lokalidad.
