BAGUIO CITY- Binallaagan manen ti lokal a gobyerno ti Baguio City dagiti business establishments a kumpirmaren pay dagitoy nu lehitimo ti ag-or-order kadakuada.
Daytoy ket kalpasan a naisaruno a naaramat ti nagan ni Vice Mayor Faustino Oloan iti scam nu sadino nag-order ti scammer iti nangina a taraon ken mainom ken nagkiddaw pay iti cellphone load manipud iti maysa a business owner.
Pinagyamanan met ni Mayor Benjamin Magalong gaputa saan a nabiktima ti business owner gaputa dinamagna pay nu pudno ti naawatna a text message nga agpadeldeliver ni vice mayor Oloan iti taraon ken mainom.
Impetteng ti mayor nga scam daytoy gaputa saan a pudno a nag-order ti bise-mayor.
Maipalagip nga idi napan a lawas ket nangipila iti kaso nga estafa ti maysa nga establishement owner sadiay Lualhati barangay kontra iti saan pay a nabigbig a suspek a nangaramat iti nagan ni Mayor Magalong rason a nakadawat daytoy ti P1,200 a cellphone load.
Nag-order pay ti caller iti taraon ken arak nga aggatad iti P24,880 ngem kinanselarna metlaeng gaputa ti orderna a brand ket awan iti nasao nga establishemento.
Immunan a naaramat ti nagan ni Mayor Magalong iti scam idi 2019 nu sadino innem a restaurant ti nabiktima dagiti scammer.
Ad-adda pay a napalawa ti insidente idi Marso nu sadino inaramat dagiti scammer ti nagan ti mayor tapno makaorder ti taraon ken daduma pay iti maysa a restaurant sadiay Sagada, Mt Province.
Gapu iti daytoy, imbalakad met ni Baguio City Police Office Information Officer PLt. Col. Judy Palicos nga agridam ken pag-alerto dagiti residente kontra iti nasao a modus.
