BAGUIO CITY – Naipasidong iti nagduduma a klasipikasyon ti community quarantine wenno iti localized lockdown dagiti nagduduma a munisipyo ti Abra kabayatan ti agdama a pandemya gapu iti COVID-19.
Maibasar kadagiti kaudian a pammilin a pinirmaan ni Abra Governor Joy Bernos, naipasidong iti Enhanced Community Quarantine (ECQ) ti Lacub nga agpaso inton August 16.
Gapu iti daytoy, maysa laeng ti mapalubosan a rumuar iti tunggal pagtaengan tapno apan gumatang kadagiti pagkasapulanda.
Agtalinaed met iti Modified Enhanced Community Quarantine (MECQ) ti Tineg, Lagangilang, Licuan-Baay ken Malibcong bayat a naipasidong iti General Community Quarantine (GCQ) ti Daguioman, Bucloc, Sallapadan, Lagayan, Dolores, San Juan, Bucay ken Tayum.
Naideklara met ti Modified General Community Quarantine (MGCQ) kadagiti dadduma pay a nabatbati a munisipio ti Abra.
Nailanad kadagiti pammilin nga agpaut agingga inton August 15 ti klasipikasyon dagiti adda iti MECQ, GCQ ken MGCQ ken nasken a suruten dagiti umili kadagitoy dagiti paglintegan iti klasipikasyonda.
Naipasdek payen ti checkpoint kadagiti sumrekan ken rumuaran ti tunggal munisipio ken barangay tapno mai-record dagiti aglasat babaen iti Travel Registry a maaramat to iti contact tracing no adda man dagiti agpositibo iti COVID-19.
