Baguio City-Pagsagsaganaan itan ti probinsya ti Benguet ti panaglukat ti maikapat nga edisyon ti Benguet Martial Arts Festival nu sadino maysa kadagiti combative sports a maimatangan ditoy ti Taekwondo intun Setyembre trese idiay Benguet Sports Complex sadiay Wangal, La Trinidad, Benguet.
Dagiti Taekwondo practitioners ket nagtaud manipud iti nagduduma a paset ti pagilyan para iti maysa nga aldaw a high level competition.
Ditoy a masubok ti kinalaing ken kinasiglat dagiti atleta ken gundaway metten daytoy tapno maipaayanda iti naan-anay nga exposure.
Adda dagiti nagduduma a kategorya ti paglalabanan dagiti Taekwondo fighters, dagitoy ti Poomsae, Sparring ken Combat a salipan dagiti nagduduma nga age brackets.
Sigun kenni Danrey Velo, ti tournament director ken organizer iti Taekwondo Tournament , dagiti mabigbig a winners wenno mangabak iti pasalip ket maikkan gundaway a lumaban iti mapadpadaanan a Teakwondo events a maipatungpal iti uneg ti pagilyan.
Adda dagiti naisagana a medalya, trophies ken certificate a maipaay kadagiti agballigi ken partisipanti iti nasao a martial arts competition.
Ti sports competition ket babaen iti koordinasyon ken partnership iti Samahang Taekwondo ng Pilipinas, Kombat Taekwondo Philippines ken World Martial Sports.
Malaksid iti taekwondo, karaman pay nga ay-ayam iti martial arts festival ket ti arnis ken kickboxing competitions.
