BAGUIO CITY – Irekrekomendar ti Police Regional Office Cordillera (PROCOR) ti naiduma a pagalagadan iti panaka-ala wenno panakarukod ti body mass index (BMI) dagiti Igorot a pulis nga addaan nabaneg a pammagi.
Sigun kenni PBGen. R’Win Pagkalinawan, dadaulo ti PROCOR, irekrekomendarda ti panakarukod ti pungua-punguan, barukong ken edad dagiti pulis nga Igorot gaputa dagitoy ti mangipakpakita iti typical body frame wenno kababagi dagiti Cordilleran.
Inlawlawagna nga iti sistema iti panagala ti BMI ket marukod ti kinatayag ken kinadagsen ti maysa a tao tapnu maamuan no daytoy ket overweight wenno nalukmeg.
Nupay kasta, impettengna a saan a maiyaplikar ti nasao a sistema kadagiti Cordilleran gaputa ti natural a kababagi dagitoy ket bassit ken nabaneg nga addaan dadakkel a tultulang.
Innayonna a no maiyaplikar ti agdama a sistema ti panagala ti BMI kadagiti pulis iti Cordillera ket adu kadagitoy ti makwalipikar kas obese, overweight wenno nalukmeg.
Dinakamatna nga iti nasao a sistema ket 52 percent laeng kadagiti personnel ti PROCOR ti nakapasa iti baet a dagiti pulis iti Cordillera ket maibilbilang a physically fit nga uray pay maibaga a nalukmeg dagitoy.
Impettengna pay nga uray maikonsidera a nalukmeg dagiti pulis iti Cordillera no agbasar iti standards ti BMI ket napipigsa met dagitoy a kumalay-at kadagiti bantay ken magna iti minilya a distansia.
Gapu iti daytoy, mangnamnama ni Pagkalinawan iti panangaprobar ni PNP Chief Police General Archie Gamboa iti rekomendasyonda tapnu maiyaplikar met kadagiti dadduma pay a pulis a tubo ti Cordillera a nakadestino iti dadduma a rehiyon iti pagilian.
Immunan nga imbilin ti PNP Chief ti panagbalin dagiti amin a pulis a physically fit ken nakuttog tapnu maaramid dagitoy ti mandatoda ken dagiti mabagsak iti BMI ket saan a maka-aplikar para iti promotion.
