Manarimaan ti pannakikoordinar ti Philippine National Police (PNP) kadagiti maseknan nga ahensia mainaig iti warrant of arrest a naipaulog kontra kenni sigud a congressman Zaldy Co ken 17 nga indibidual.
Iti statement ni PNP Acting Chief Police Lieutenant General Jose Nartatez Jr., impanamnamana ti nainkalintegan a pannakaipatungpal dagiti warrant ken siniguradona a masurot ti due process.
Sigun iti nasao nga ahensia, nainget ti koordinasion dagitoy iti Sandiganbayan ken dadduma a maseknan nga ahensia tapno masigurado ti nainkalintegan ken naurnos a pannakaipatungpal ti warrant.
Impetteng pay ti PNP a maikkan dagiti akusado ti garantisado iti sidong ti linteg.
Kabayatanna, naipaulog ti Hold departure orders kadagiti akusado ngem inyunay-unay ti Department of Foreign Affairs (DFA) nga awan paylaeng ti naipaulog a court order a mangkanselar iti passport ni Co.
