Indagadag ni Senate Finance Committee chair Sherwin Gatchalian iti Department of Trade and Industry (DTI) ken iti Department of Agriculture (DA) a nainget nga imonitorda ti retail prices dagiti kangrunaan a gagatangen wenno basic goods kagiddan ti tension idiay Middle East.
Sigun kenni Senator Gatchalian,rumbeng nga agsagana ti gobyerno iti posible a pangmatagalan wenno long-term nga epekto iti nasao a krisis kadagiti basic commodities nangruna ket ngimmato ti inflation rate iti pagilian idi napan a bulan.
Ti nasao a tignay ket gapu iti pangta iti agtultuloy a panagngato iti presyo dagiti produkto a petrolyo kagiddan ti tension iti nagbetan ti Iran kontra iti Estados Unidos ken Israel.
Malaksid iti Estados Unidos ken Iran a karaman kadagiti kadaklan nga oil producer iti sangalubugan, adu metlaeng kadagiti pagilian idiay Middle East ti kangrunaan a pagtataudan ti lana kas iti Saudi Arabia,Qatar,United Arab Emirates (UAE) ken Kuwait nga agpapada a pinuntirya ti Iran nga atakaren gapu iti kaadda dagiti base militar ti Estados Unidos sadiay.
