BAGUIO CITY – Ad-adda a maingetan dagiti pagalagadan seknan iti COVID-19 a maipatungpal iti transport sector ditoy siudad ti Baguio gapu iti ngumat-ngato a kaso ti nasao a sakit iti lokalidad.
Sigun kenni Engr. Philip Puzon, Executive Assistant V ti City Mayor’s Office, naipaayan iti agingga February 1 ti agdama a tawen dagiti amin a drivers ti jeep ken taxi a mangisimpa kadagiti plastic barriers ti lugan dagitoy tapno maipanamnama ti kinatalged dagiti pasahero nga aglugan.
Kinunana a binilindan dagiti personnel ti Baguio City Police Office ken Public Order and Safety Division para iti nainget a panakaiwanawan ti panagtungpal dagiti jeepney ken taxi drivers iti nasao a pagalagadan.
Innayonna a mamulta dagiti maseknan a drivers iti kanito a maduktalan a saanda nga agtungpal iti nasao a pagalagadan sakbay ti naituding a deadline.
Kabayatanna, inyunay-unay ni Puzon a kadagiti met pribado a lugan ket nasken nga agisuot dagiti drivers ti facemask kabayatan ti panagmaneho dagitoy.
