Kinumpirmar ti Calanasan Municipal Environment and Natural Resources Office (MENRO) a nasarakanda ti naisangsangayan a kita ti sabong a maaw-awagan kas Jade Vine wenno paga-ammo iti lokalidad kas Tayabak.
Nasarakan daytoy kabayatan ti on-site assessment dagitoy iti kabakiran a paset ti Barangay Tanglagan ken Langnao, Apayao.
Sigun iti MENRO, nasarakanda ti nasao a mula a natural a nagtubo kadagiti undisturbed forest sections.
Maipalagip a ti Jade Vine wenno Tayabak ket maysa a kita ti mula nga endemiko iti Pilipinas.
Mabigbigbig gapu iti naisangsangayan a bluish-green a sabongna.
Masarakan metlaeng ti imahe daytoy iti Philippine five-peso coin.
Ti Jade Vine ket saan a nagatel no sagiden ti tao, saan a kas iti Mucuna pruriens wenno ti maaw-awagan iti lokalidad a “Sabawil.”
Gapu iti limited distribution ken specific habitat requirements ti nasao a mula, manmanu a masarakan daytoy.
Mainaig iti dayta, napaliiw ti MENRO a ti Jade Vine ket nakadipende kadagiti panniki para iti pollination daytoy.
Malaksid iti dayta, agbiag daytoy iti healthy wildlife populations ken saan a nadadael a forest ecosystems.
Kabayatanna, kinuna ti MENRO a ti pannakadiskobre ti nasao a mula ket mangipasimudaag iti napintas a kasasaad ti aglawlaw iti nasao a lugar.
Pakairamanan daytoy ti nasustiner a kabakiran ken minimal disturbance.
Inyunay-unay pay ti nasao nga opisina a kasapulan ti agtultuloy a panagregget tapno maprotektaran dagiti natural a habitats sadiay.
