Kidkiddawen dagiti mammanday linteg ti Makabayan bloc iti Philippine National Police a palubusanda ti innem nga aktibista a naarestar bayat ti Labor Day rally iti asideg ti United States Embassy idiay Manila a mangsalsaludsud kadagiti otoridad gapu iti naipadamag a saanda nga ipatpatungpal ti “maximum tolerance” a panangpapanaw kadagiti agproprotesta babaen ti panagbombada ti danum.
Sigun kenni Kabataan Partylist Rep. Raoul Manuel , naimatangan ti maysa a mangipatpatungpal ti linteg a nagbomba ti danum kadagiti agpoprotesta tapno mapapanaw dagitoy ngem kalpasan ti sumagmamano a minutos, iligal a kinemmeg dagiti Manila Police District ti innem nga aktibista a nadangran bayat ti nasao nga aktibidad.
Iti agdama, awan paylaeng ti komento ti Manila Police District maipapan iti nasao a banag.
Maipalagip a dagiti transport ken labor group a nakipaset iti protesta idi kalman, Mayo 1 ket mangkidkiddaw ti kanayunan a sueldo iti intero a Pilipinas.
Naipadamg a dagiti kameng ti pulis ket bayolente ti panangpapanawda kadagiti agproportesta sadiay pakairamanan dagiti agtutubo nga aktibista.
Maibasar iti report, adda pay dagiti mapapati a nadangran babaen ti “truncheons” wenno “batuta”.
Impagenetget ni Manuel a saan a nainkalintegan ti naranggas a panangpapanaw gaputa awan ti dakes nga inaramid dagiti raliyista ken ti awagda a maipangato ti sueldo.
“Ang tanging pinapanawagan ng mga kabataan ay para saating mga mangagawa, ang pagtaas ng sahod nationwide. Unlike doon sa gusto ng adminstrasyon na papatse-patse, pinapasa ang issue sa wage boards,” kinuna ni Manuel.
Kabayatanna, kinondenar metlaeng ni ACT Teacher Partylist Rep. France Castro ti nasao nga insidente ken indiligna daytoy iti panagbomba ti danum dagiti Chinese Coast Guard kontra kadagiti Filipino vessels idiay West Philippine Sea.
“Habang tayo binobomba ng Chinese Coast Guard pero ang PNP naman binobomba ang mga rallyista, aktibista at mamamayan na sumasali sa mga lehitimong panawagan para sa sahod, para dun sa mga polisiya sa pag gawa,” kinuna ni Castro.
“May 1 is a red letter day, it is celebrated every year internationally. Hindi dapat kinikitil ang boses ng mga manggagawa”, innayon ni Castro.
Sigun iti Labor group Kilusang Mayo Uno, ti panangngato ti sueldo ket naaprobaran idi napalabas a tawen ngem saan nga umdas a mangsaklaw kadagiti inaldaw a gastos nangruna ta ngimmato ti presio dagiti kangrunaan a gagatangen.
Idi 2023, inaprobaran ti regional wage board ti National Capital Region ti P40 a pannakaingato ti inaldaw a minimum wage, a kurang iti P750 a panagngato ti sueldo nga ibagbaga dagiti labor groups a kasapulan tapno maipaay dagiti kangrunaan a kasapulan dagiti pamiliada ken disente a kasasaad ti panagbiag dagitoy.
