BAGUIO CITY- Agtaltalinaed latta a parikut iti Baguio City ti panagngato ti bilang dagiti agtutubo nga agar-aramat ti vape iti baet a maiparparit daytoy.
Iti pannakiuman ti Bombo Radyo kenni Daryll Kim Longid, dadaulo ti Public Order and Safety Division – Baguio, kinunana nga agbalbalin a global trend ti panagaramat ti vape nu sadino dagiti umuna a target market iti daytoy ket dagiti agtutubo.
Gapu iti daytoy, kanayon latta a mangisaysayangkat ti nasao nga opisina ti operasyon tapno matiliw dagiti indibidual nga agar-aramat ti vape iti siudad ti Baguio.
Malaksid iti dayta, agtultuloy pay ti inspeksyon ti Public Order and Safety Division kadagiti business establishments tapno makumpiskar dagiti mailaklako a vape.
Nupay kasta, inaklon ni Longid a karit kadakuada dagiti mailaklako a vape kadagiti online shops
Gapu iti daytoy, kidkiddawen ti nasao nga opisyal ti pannakitinnulong ti nasyonal a gobierno tapno malapdan ti panagaramat ti vape.
Sigun kenni Longid, planoda a makikoordinar iti Philippine Drug Enforcement Agency (PDEA) – Cordillera tapno masukimat dagiti makolkolektarda a vape nu adda ti linaon dagitoy nga iligal a droga ken dadduma pay.
