BAGUIO CITY – Nabakunaanen kontra iti COVID-19 ti 1,010 a senior citizens sadiay La Trinidad, Benguet.
Sigun kenni La Trinidad Mayor Romeo Salda, resulta daytoy ti tallo nga aldaw a panagbakuna kadagiti senior citizens ti munisipyo idi napalabas a lawas.
Dinakamatna a naawat dagiti benipisyaryo ti umuna a dose ti AstraZeneca vaccine.
Kinunana a 1,000 a doses ti nasao a bakuna ti naawatda bayat a ti kanayonan a 10 a doses ket nagtaud iti dadduma a munisipyo ti Benguet.
Naamuan a nasurok 35,000 nga indibidual ti nagpalista mga agpabakuna sadiay La Trinidad kontra iti COVID-19 ngem naipangruna dagiti adda iti priority list nga intuding ti nasyonal a gobyerno.
Inyunay-unay pay ni Mayor Salda ti kinapateg ti panagpabakuna kontra iti COVID-19 gaputa maysa daytoy a wagas tapnu agsubli iti normal ti kasasaad ti panagbiag ken maaddaan iti proteksion kontra iti nasao a sakit.
