Dumanonen iti nasurok sangagasut lima pulo a Pilipino ti agkidkiddaw ti tulong kalpasa a karaman ti pagtaenganda kadagiti nauram iti wildfires iti southern California, sigun kenni Consul General Adelito Angelito Cruz.
Kinuna ni Cruz a makikikoordinaren ti consulate general idiay Los Angeles iti Filipino Workers Center, nga umaw-awat ti awag para kadagiti agkidkiddaw ti tulong.
Kinuna pay ni Cruz nga ar-aramidenda ti amin a wagas, ken dinakamatna nga adu ti evacuation centers ti naipatakder iti LA County nu sadinno namnamaenda a maipaayan ti amin iti temporary housing.
Adda metten dagiti taraon, mainum ken dadduma pay a kangrunaan a kasapulan dagiti amin nga agtaltalinaed kadagiti evacuation center idiay California.
Kabayatanna, dumanon iti duapulo ket uppat ti pimmusay iti wildfires ken agarup sangagasut a ribo a tattao ti naibakwit.
Mapatta-patta a 12,000 estruktura ti nauram karaman dagiti babbalay dagiti nalalatak nga artista idiay Amerika.
Agtultuloy met iti panagsebseb dagiti bumbero manipod iti pito nga estado ti Amerika, karaman ti manipod iti Canada ken Mexico.
