BAGUIO CITY – Dumanonen iti nasurok 49,000 nga COVID-19 vaccines a pakairamanan ti CoronaVac, AztraZeneca ken Janssen vaccines ti naan-anayen a naibakuna kadagiti priority groups iti probinsia ti Kalinga.
Gapu iti daytoy, dumanonen iti 30,187 ti bilang dagiti umili iti probinsia ti fully vaccinated wenno naan-anayen a nabakunaan.
Manipod iti nasao a bilang, dumanon iti 17, 498 ti naipaayan ti Janssen wenno ti single dose vaccine bayat a 19, 638 ti nakaawaten ti first dose ken 12, 698 iti second dose dagiti bakuna.
Naamuan a dagiti nabakunaan ket manipod iti A1 category wenno dagiti health frontliners, A2 wenno dagiti senior citizens ken A3 wenno dagiti addaan iti comorbidities
Maibasar iti datos ti Provincial Health Office, 17.93% laeng daytoy ti 168,387 a bilang dagiti puntiryada a mabakunaan iti nasao a probinsya
Kagiddan iti dayta, narugyan metten iti panagbakuna kadagiti uniformed personel a naideploy wenno naiwaras sadiay kas kadagiti kameng ti Philippine National Police, Armed Forces of the Philippines, ken Bureau of Fire Protection a karaman iti A4 category.
Inlawlawag met ti Provincial Health Office a mangisaysayangkatda iti vaccination sessions kadagiti centralized ken decentralized areas ken mangipapaayda metlang iti outreach services kadagiti saan a makaturung kadagiti vaccination areas.
