BAGUIO CITY – Dumanon iti 6,000 a pulis ken force multipliers ti maiwaras iti innem a probinsia ken dua a siudad iti Cordillera tapnu mangipaay ti seguridad kadagiti estudyante iti panagrugi ti serrek dagitoy inton Lunes, June 3.
Sigun kenni Cordillera PNP Director Israel Ephraim Dickson, mangiwarasda iti nasurok 5,100 a pwersa a bukbuklen ti 3,700 a pulis ken 1,300 a force multipliers a buklen met dagiti barangay tanods, civilian volunteers, miembro ti Parents Teachers Association ken dagiti communications groups.
Kinunana a dagitoy ti mangipasigurado iti kinatalged ken naannayas a panaglukat ti serrek dagiti ubbing.
Dinakamatna a malaksid kadagiti pulis ket adda metlaeng dagiti K-9 units nga agsukimat iti posible a presensia dagiti iligal a droga ken pampabettak.
Bantayan met dagiti highway patrol operatives ti trapiko tapnu maiwanawan dagiti kalsada nangruna kadagiti kalsada kadagiti nagduduma a pagadalan.
Inwaragawag met ni Baguio City acting director Police Colonel Allen Rae Co a dumanon iti 100 a pulis ti maiwaras iti nagduduma a pagadalan ditoy siudad.
Maibasar iti 2019-2020 records ti Department of Education – Cordillera, manamnama a 430,680 nga estudyante iti rehiyon ti sumrek iti klaseda inton Lunes.
