BAGUIO CITY – Dumanon iti nasurok P3.7-M a gatad ti marijuana ti nakumpiskar dagiti pulis manipud iti tallo a lallaki iti naipatungpal a checkpoint sadiay Barangay Sinto, Bauko, Mountain Province idi kalman.
Babaen iti tip ti maysa nga impormante, nakemmeg ti tallo a lalaki a mangibiahe kuma iti kontrabando.
Maibasar iti report ti Police Regional Office Cordillera, nakalugan dagiti suspek iti Rising Sun Bus a nagtaud manipud Bontoc, Mt. Province ken paturongda kuma ditoy siudad ti Baguio idi pinasardeng dagitoy dagiti pulis.
Iti inspeksyon dagiti pulis ken nakumpiskarda dagiti bulto ti bulong ti marijuana.
Nakemmeg met dagiti suspek a da John Cario Orille Reynera, 19, construction worker; Kerwin Ulanday Ortega, 22; ken ni Angelito Puedan Dilao, 19, a bin-ig a residente ti Sampaloc, Manila.
Segun kenni Regional Director PCSUPT Elmo Sarona, addan iti kustodiya dagiti maseknan a police stations dagiti nakemmeg a suspek agramanen dagiti ebidensiya ken iti agdama ket sumangsango dagiti suspek iti panaglabsing iti Comprehensive Dangerous Drugs Act of 2002.
