BAGUIO CITY – Dinadael dagiti operatiba ti nasurok P9.88-M a gatad dagiti pinuon ti marijuana iti eradication operation kadagiti kabambantayan ti Kibungan , Benguet.
Nadiskobre dagitoy iti 14 a pagmulaan sadiay Sitio Dalipey ken Sitio Amistong iti Barangay Tacadang kabayatan ti tallo nga aldaw nga operasyon.
Sigun iti PDEA-Cordillera, nakaawatda ti impormasyon manipud iti maseknan nga umili ti Kibungan mainaig kadagiti nasao a pagmulaan ti marijuana.
Dagus dagitoy a nangisayangkat ti operasyon idi January 11-13 tapnu makemmeg dagiti cultivators.
Nupay awan ti nadanunan dagitoy a cultivators, nadiskobre met dagiti operatiba ti 34,420 a pinuon ti marijuana ken 25,000 grams ti naapiten a pinuon ti marijuana.
Nauram dagiti iligal a mula iti nakasarakan kadagitoy bayat a nagala dagiti operatiba iti agserbi nga ebidensia.
Mainaig iti daytoy, al-allukoyen ti PDEA-Cordillera dagiti LGUs nangruna dagiti nakadiskobrean dagiti pagmulaan ti marijuana iti panangirtengda iti kampanyada tapnu maipaka-ammo kadagiti masakupanda dagiti dakes nga epekto ti marijuana.
