Nasurok tallo ribo nga indibidwal ti naibakwit manipod kadagiti nagduduma a munsipyo ken siudad idiay Albay gapu iti panagbettak wenno panagalburoto ti Bulkang Mayon.
Iti datos nga inruar iti Albay Provincial Information Office, dagiti 983 a pamilya a buklen dagiti 3,589 nga indibidwal ket nagtaud idiay Ligao City, Tabaco City ken kadagiti munsipyo iti Malilipot, Camalig, ken Guinobatan.
Sigun kadagiti otoridad,kaadwan kadagiti nagbakwit ket agnanaed iti asideg ti danger zone.
Immunan nga impaisidong ti Philippine Institute of Volcanology and Seismology (PHIVOLCS) iti Alert Level 3 ti nasao a bulkan a kaawatan nga addaan daytoy iti magmatic unrest ken dakkel ti posibilidad ti panagbettakna.
Maipalagip a nakailista ti PHIVOLCS iti dome-collapse pyroclastic density current (PDC) idi laeng kalman iti agsapa nu sadino, nangiuar ti bulkan iti ash plume a dimmanon iti agarop 1,000 a metro kangato.
Iti agdama,agtaltalinaed paylaeng iti Alert Level 3 ti bulkan ken nainget a maiparit ti panagturong iti Permanent Danger Zone gapu iti pangta iti lava flows ken rockfalls.
