Impasigurado ni President Ferdinand ”Bongbong” Marcos Jr. a natalna ken nasayaat a maipatungpal ti Bangsamoro elections inton tawen 2025.
Nu pay kasta, nagballaag ti presidente kadagiti indibidual a mangpangpanggep a mangdadael ti nasayaat ken demokratiko a proseso nu sadinno, kinunana nga agserbi a kalabanda ti gobierno.
Ti komitment ni Marcos ket bayat ti maika-10 nga anibersaryo ti panagpirma ti Comprehensive Agreement on the Bangsamoro iti headquarters ti 1st Marine Brigade idiay Barira, Maguindanao del Norte.
Malaksid iti dayta, inkarina pay nga aramatenna ti pannakabalinna tapno maipasigurado ti talna ken nasayaat nga eleksion idiay Bangsamoro Autonomous Region in Muslim Mindanao.
Iti sabali a bangir, guyguyuguyenna dagiti residente ti Bangsamoro nga aramatenda ti karbenganda nga agbotos iti umay nga eleksion.
Idi Marso 2023, pimmasa ti Bangsamoro Transition Authority iti Bangsamoro Electoral Code, a mangipalubos iti demokratiko a pannakipaset iti lokal ken rehional nga eleksion.
Maisayangkat kuma ti umuna nga eleksion ti Bangsamoro Region idi Mayo 2022 ngem naitantan gapu iti COVID-19 pandemic.
