BAGUIO CITY – Inpanamnama ti Police Regional Office Cordillera (PROCOR) nga agbalin a natalna, nakappia ken natalged ti Summer Season, Lenten Season ken ti obserbasion ti Holy week iti rehion.
Sigun ken PCapt. Marnie Abellanida, panakangiwat ti PROCOR, umdas ti nasurok 9,000 a personnel ti ahensia a maiwaras kadagiti nagduduma a lugar iti Cordillera para iti kampanya dagitoy a “LIGTAS SUMVAC 2022”.
Kinunana a nangrugi pay idi Abril 1 ti deployment dagiti pulis kadagiti lugar a kadawyan a pagturturongan ken pakaur-urnong dagiti tattao kas ti simbaan, malls ken pagpasyaran.
Dinakamatna a tuttutukanda metlaeng dagiti kalkalsada tapno maliklikan ti panaglabsing dagiti motorista kadagiti paglintegan ti trapiko a maysa kadagiti makaapektar iti gunay ti trapiko.
Kagiddan iti dayta, ipalpalagip ni Abellanida kadagiti motorista iti pannangipasiguradoda a nasayaat ti kondisyon dagiti luganda sakbayda nga agbiahe tapno mailiklikda iti aniaman nga aksidente.
Kabayatanna, inyunay-unayna iti publiko ti pannakaiserra nga umno dagiti ridaw ken tawa ti pagtaenganda sakbayda a panawan.
Imballaag pay ni Abellanida ti panangsukimatda dagiti vendors kadagiti kwarta nga ibaybayad dagiti kustomer sakbayda nga awaten daytoy.
Kasaruno daytoy ti panakabiktima dagiti sumagmamano a vendor sadiay Banaue, Ifugao iti peke a sangaribu a pesos nga imbayad kadakuada ti nagbalin a kustomer dagitoy.
